Faasnacht 2026

DUSCHUURLI

Pfyfferclique Basel

Grindigsjoor:1983

Carnevalis digitalis

Aimool bäng, scho isch er wägg.

Erfillt är ainewääg dr Zwägg,

dr Rädäbäng, dr Fasnachtsfierer?

Phunggto Bapyyr isch är Verlierer.

S Comité nimmts nit so sträng,

s gieng au ooni Rädäbäng.

Zmindescht miesst menen nimm drugge,

so kennt aim dä au niemerts mugge.

Me gieng drum jetzt scho digital,

in 10 Joor sig das ganz normal.

D App sig baraad zem laade,

sogar in Hauchditsch, grad fir Schwaabe.

Au in Änglisch kasch dert lääse

ibers Basler Fasnachtswääse.

Aber Franzi, nom de bleu,

ka die super App nit, nöö.

Als Clique hän mer is denn dänggd,

ebs bi unserem Zeedel länggd,

wenn mer dä au nimm dien drugge

und bewyyse Muet zer Lugge.

Um kaim denn d Fraid derbyy z vermyse,

wird uff e QR-Code verwise.

Uff Kopf und Goschdyym hets Blakaat

fir e Zuegang unds Formaat.

So setts denn au im Laie glinge,

e Bligg in die Datey z erringe.

Dert kame lääse, wenns denn goot,

was uff däm Zeedel gschryybe stoot.

Und unser Goschdyym, ooni Gschyss,

isch ganz aifach numme wyss.

So ischs jedem iberloo,

es mit KI oder esoo

phantasievoll farbig z gstalte

oder au nit, denn blybts bim Alte.

Wyter wänn mir nimme goo,

ab do het is dr Muet verloo.

Denn Fasnacht numme no viral,

wär wool nyt fir unser Bâle.

Ebbis virtuell go dringge,

das tät is doch ganz gruusig stingge.

Und wie hättes d Baize schweer,

wenn iiri Disch denn blybte leer.

Physisch geen mir drum uff d Gass,

sunscht miechti d Fasnacht jo nimm Spass.

Liebs Comité, was dädsch denn blaane,

wenn Fasnacht isch und kain goot aane,

alli im Sässel täte blyybe,

d Määlsuppe dert denn iiverlyybe

und Räppli schmeisse virtuell,

dehaim bis ibers Biechergstell?

Nai, mer wänns nit ibertryybe,

fir dasmol bi de Faggde blyybe.

Ganz so schlimm isch es jo nit

und Rädäbang wird no zem Hit,

schwirrt viral durch alli Gasse,

kasch en like oder hasse.

Jo, nadiirlig, d Gfoor bestoot,

dass das e Ami nit verstoot

und d Fasnacht grotet iber Nacht,

grad in e Generalverdacht.

Das wär denn s Änd vo däre Gschicht

und miecht uns blaich im ganze Gsicht:

Dr Carnevalis digitalis

fierti zem Exitus letalis*.

*Tödlicher Ausgang resp. „aus die Maus“